Üsi Reis nöcheret sich ihrem Endi, i 3 Tagesfahrte gohts via Augusta und d’Wygebiet vo Margareth River zrugg noch Perth.
S’nasskalte und sehr windige Wetter passt eigentlich hervorragend zum Cape do, aber zum d’Gegend uf usdehnte Walks z’erkunde, ladts natürlich nöd i.
Aber eigentlich isches au nur en kurze Stop gsi, zum üsere Fahrtag ufzbreche. Vom Campingplatz in Margareth River simmer total begeisteret, sichted am Obet sogär no es Possim, allerdings im Dunkle und ufem Baum, hät nur für es Pfoteföteli gnüegt.
Nur leider verschiffets üs de Tag do komplett, mir verbummleden mit Käfeli, Bierli und es biz Graffiti aluege.
Igitt Fahrtag… Im Leeuwin-Naturalist NP langt üs drum Ziit nur für Canal Rock (spannend), Smith Point (eigentlich nur en sterile Badeort) und natürlich s’Cape Naturaliste Lighthouse.
Unterwegs kehremer im Lavender Cafe i, richtig schnüggig, au wenn me sich hinteher vo sim Gruchsssinn verabschiede ka…
Als könnt s’Wetter kei Wässerli trüebe. Me würd nöd glaube, dasses die ganz Nacht duregschiffet hät und mir hüt im Nasse zämepackt hönd…
Üsere letschte Sundowner am Beach vo Rockingham isch herrlich gsi. Also de Sundowner und de Sunneuntergang, nöd de Beach. Hönd versehentlich en Dog Beach nebst ere riesige Werft usgsuecht, aber grad südlich vo Perth isch immer schwierig und alles usbuechet. Also isch de Beach es biz wäääh und de Camping luut.
