Bye bye Monteverde. Üseri Reis nöcheret sich em Endi und mir muend üsers geliebte Monteverde verloh. Nochem mir bide Ufefahrt schlichtweg de Nerv nüme ka hond, zum für es Föteli z’stippe, machemer das jetzt ufem Weg is Flachland.
Noch all üsere Stauerfahrige simmer vorsichtig, fahres früe los Richtig San Jose und was isch, nix, ganz smoothe Verkehr, sogär en Stop liit drin,
bevor mir üsers Äuteli muend zrugg geh und üs im Hostel in San Jose iquartiered, wunderschön isches, also s’Hostel, nöd San Jose.
San Jose isch en Moloch. Uf dä Suechi nocheme Outdoor Cafi laufemer zielstrebig Richtig Zentrum, wohne tuemer im sichere Barrio Otoya. Nur, mir findes keis, alles Indoor, es wird au kalt. Das erklärt au, wieso nur mir doofe Touris i kurzr Hose unterwegs sind, mer kond üs schön deplatziert vor.
Also schön isch die Stadt nöd, sehr dreckig, überall Penner und erscht ufem Rückweg zum Hostel findemer einige, wenige schöni alte Gebäude.
Am Obet hommer üs vom Schock es biz und finded es härzigs Restaurant, nur schad isch s’Ässe am Rande des Geniessbaren… Mer bruuched beide es Bier und es biz Pubfood hinterher.
Ufem Weg zum Desayuno is Barrio Escalante findemer en huufe cooli Murales.
Au isch das Barrio richtig härzig
und mir wörfed kurzerhand de plante Touri Sighseeing Trip wo üs scho gescht i dä hässliche Egge gführt hät über de Huufe, lond üs es biz triibe
und lueged nur no de mercado a.
Am Endi wirds doch no en schöne Ufenthalt und San Jose lohnt sich, wenn me vorem Abflug no vorige 24 Stund Ziit hät. Für üs heissts jetzt aber leider, bye bye Costa Rica, es isch herrlich gsi!
